تحذير من التعامل مع شركة عرب اى كوم arabecomm

تحذير من التعامل مع شركة عرب اى كوم arabecomm - ياريت تقرأوا الموضوع للنهاية لأنه مهم جدا وممكن الشركة دى تنصب على حد فيكم

الشركة دى ياشباب تدعى انها شركة برمجة وتصميم مواقع وتدريب ولكنها فى الحقيقة مجموعة من النصابين
ماحدث معى اقوله لكم بالظبط وهو موجود فى محضر بقسم شرطة مدينة نصر

كنت بدور فى النت على شركة كورسات تسويق الكتروني ولقيت الشركة دى اتصلت بيهم وكلمتنى بنت اسمها مروة قالتى انها السكرتيرة سالتها عن تفاصيل الكورس وكانت محتوياته كويسه جدا وقالتلى تكلفة الكورس 850 جنيه قلتلها تمام

وبعدين سالتها عن المقر قالتلى فى بنها قلتلها طيب احنا بنات ومن القاهرة ومش هنعرف نيجى قالتلى ممكن تبقى الدروس اونلاين من خلال تقنية جديدة اسمها ويبنار وقالتلى البشمهندس هيشرحلك اكتر

وفعلا فيه حد كلمنى اسمه أشرف وهو ده النصاب الكبير وقالى ان الشرح من خلال النت افضل بكتير من الدروس التقليدية وده النظام المشهور فى اوروبا وهو الاحدث ، المهم اتفقت انا واتنين معايه ناخد الكورس ده وفعلا اخويا راح شاف المقر بتاعهم وفعلا ليهم شركه فى بنها فى شارع اسمه النزهة ودفع فلوس الكورس كلها لينا احنا التلاته 2550 جنيه وقالوا الكورس هيبدأ فى يوم 25 مايو

استنينا ليوم 25 مايو ومحدش كلمنا خالص اتصلت انا يوم 24 وسالت السكرتيره قالتلى للاسف الكورس اتاجل ليوم 1 يونيو احنا هنتصل بيكم قبلها نقولكم على المواعيد بالظبط

استنينا ليوم 30 مايو واتصلنا محدش رد علينا
اخويا راح تانى الشركه قالوله ان فيه عطل عندهم فى برنامج الويبنار وهيتصلح قريب ، قالهم طيب انا عايز الفلوس على ماتصلحوا برنامجكم قالوله هنخصم منها 50% المهم اتخانق معاهم وطردوه من الشركة وقالوله ملكش فلوس عندنا ولو تقدر ثتبت حاجه ، راح القسم اللى فى بنها يعمل محضر الظابط قاله انت جايبلى ورقه مكتوب عليها اسم شركه وتقولى ده وصل بس الظابط قاله الوصل اللى معاكم ده ورقه وخلاص مكتوب عليها اسم شركة بدن ختم وبدون اى حاجه ومش هتقدروا تاخدوا حاجه ومرديش يعمل محضر

رجع مدينة نصر وعمل المحضر والظابط قاله انت مش هتقدر تاخد حاجه لانك مفيش معاك دليل او شهود انت موقفك ضعيف وخلاص اتنصب عليك
---------------------------
دى الحكاية باختصار ياشباب انا نشرتها ونفسى حد يساعدنى ويقولى ارجع الفلوس ازاى .. .. ربنا ينتقم من كل ظالم
ياريت ياجماعه تشيروا الموضوع عشان كلنا ناخد بالنا بعد كده ، وياريت لو فى حد محامى يقولى نرجع فلوسنا ازاى

بارك الله فيك
وجزاك الله خيرا