[center]الرد ده عجبنى فى احد المنتديات فحبيت انقله حتى يستفيد منه كل الازواج بالمنتدى
قريت كتاب زمان - مش عربى طبعا - اسمه انجح الازواج الزوج الممثل الكتاب اعجبنى جدا وقررت انفذ اللى فيه حتى اعيش حياة طبيعية مش هقول سعيدة ولا رومانسية ولا بطيخ بس هقول حياة هادئة
ملخص الكتاب يقول ان الزوج السعيد هو الزوج الممثل الجيد طب ازاي ؟
اولا الزوجة احيانا كتيرة لاتحتاج من الزوج الا ان يسمعها لاتطلب حل ولا تطلب نصيحة فقط اسمعها فكن ممثل جيد ومستمع جيد لما تقوله زوجتك برغم ان 99% من كلامها لامعنى له ولايهمك بشىء ... يعنى انت راجع من الشغل دماغك خلية نمل بتفكر فى المشاكل اللى فى الشغل وبتفكر كثيرا تسيب الشغل بتفكر فى المدارس بتاعة العيال ياترى مدارس محترمة وغالية ولا تعمل زي غيرك اي مدارس وخلاص .. بتفكر فى توفير مصروف البيت لمدة سنة قادمة - وهذه اكبر غلطة بيغلطها الازواج - انه بيفتكر ان جلب الرزق بالتفكير الكثير - ابدا الرزق مقسوم ولو امنت بذلك هتستريح - نرجع لموضوع التمثيل .
لو لقيتها بتحكيلك على امها اللى راحت للدكتور والدكتور قالها ان سنانها محتاجة مش عارف ايه وان اختها جابت امبارح من كارفور زيت ورك النملة ومرات اخوها اتخانقت معاه علشان الشقة عايزة تتبيض ويجددوا العفش - عارف كله كلام ملكش انت علاقة بيه اصلا - بس لازم تسمعه وتشارك فيه ولو بابتسامة .
هل فكرت مرة انك تمثل دور نور الشريف فى فيلم حبيبى دائما يعنى تمسك ايدها وتقولها احلى حاجة حصلتلى فى دنيتى كانت انتي والشىء الجميل اللى بيهون علي حياتى وجودك معايا - طبعا الكلام ده ياثقله على الازواج - متعرفش ليه ( وانا واحد منهم ) علشان مكونش كداب ... قبل كده كان الكلام ده سهل وسلس ويطلع بسرعة وبحرارة بس الان بعد العيال وبعد سنين الزواج اصبح ثقيل ثقيل كانه جبل - المهم اتمرن على التمثيل وشوف النتائج المبهرة.
مثل الحب اللى فى دماغك واللى فى قلبك وحطه امام زوجتك ولو مش ليها - ازاي ؟ اقولك ازاي
شوفت فى فيلم اجنبى واحد صحى من النوم وكتب رسالة لحبيبته - طبعا مش مراته -
كتبلها بحبك واجمل حاجة فى حياتى وجودك لما تقري الرسالة دى اعرفى اني بفكر فيكى - وراح لزق الرسالة على باب الثلاجة.
قلت فى نفسى انا همثل الدور ده - وفعلا الصبح صحيت - لوحدى - زمان كانت بتصحينى وتفطرنى الان لافطار ولا صحيان ولا يحزنون.
المهم كتبت الرسالة بقلم ماركر خطه كبير ولزقتها على الثلاجة فى المطبخ وانا بطفح كباية عصير اغير بيها ريقى ع الصبح .
ورحت لزقتها بسلوتيب على باب الثلاجة وتوكلت على الله رحت الشغل- مش هقول على اللى حصلي لما رجعت من الشغل - لانه محدش هيصدقنى
والله ثم والله البيت كانه جنة - لا وايه اوضة النوم مهيئة لشهريار - وياعيال يالا خليى بابا يرتاح لسه راجع من الشغل تعبان
وغدا ملوكى وهى كانها فتاة اعلانات تستعد لعمل بروفة اغنية جديدة مع عمرو دياب - مع فارق الوزن طبعا
انما مش مهم فضلت شاري راحتى وعايش فى تبات ونبات كام يوم على هذا المسلسل .
تمثيلة الهدية الغبية : فكرت بدون مناسبة تجبلها هدية ولو حاجة ملهاش لازمة فى الحياة يعنى مثلا بنسة شعر على شكل فراشة زى بتاعة تايتنك لا بلاش موضوع بتاعة تايتنك - احسن هتقلب بغم لو مراتك شافة الفيلم
لان اول حاجة هتفكر فيها انك معجب بالبطلة .......
تمثيلة يوم راحة والغدا بره والكثير الكثير من التمثيليات اللى تخلى حياتك حلوة ولو لايام وهكذا هى الحياة ....[/center]
موضوع: كيف تعامل زوجتك 
الجمعة نوفمبر 21, 2008 7:43 pm
