مجموعة الإنفلونزا الشهيره خطر؟؟؟؟؟؟؟؟؟؟؟؟؟

ما هي مجموعة الإنفلونزا؟
طبعا كلكم عارفين
مجموعة الإنفلونزا عبارة عن كيس صغير بيعمله الدكتور الصيدلي ويحط فيه شوية حجات كده
حباية خافض للحرارة على حباية فيتامين سي على حباية استحلاب للزور يعني حجات كده تخفف أعراض البرد العادي وفي بعض الأحيان ممكن لا قدر الله تلاقي فيها كبسولتين مضاد حيوي وغالبا الصيدلي بحيط الحجات اللي مش ماشيه عنده في الصيدلية في الكيس ده وبيسميه مجموعة الإنفلونزا.........
ولما يجيله أي حد عنده أي أعراض برد يعني ارتفاع في درجة الحرارة أو إحتقان في الزور أو تكسير في العضم أو رشح يقوم مديله مجموعة الإنفلونزا
طبعا احنا مش معترضين على المجموعه دي طبعا بإستثناء( حكاية الكبسولتين بتوع المضاد الحيوي) لكن للأسف المجموعه دي اليومين دول من أخطر ما يمكن على صحة مجتمعنا ليه بقى؟؟
كلنا عارفين وأكيد سمعنا عن إنفلونزا الطيور وعارفين كمان إن أعراضها زيها زي أعراض البرد العادي أو الإنفلونزا العاديه يقوم إيه اللي يحصل بقى.....
طبعا العيان لما بيجيله شوية برد بيكسل يدفع كشف بأد كده عشان شوية برد يقوم يروح للصيدلي والصيدلي يديله الوصفه اللي هيا يعني مجموعة الإنفلونزا ويوم ولا إتنين يلاقي العيان تعيش إنت متستغربوش الكلام ده هيحصل فعلا دا إذا ما كانش حصل بالفعل
ليه العيان مات وطبعا بسبب الصيدلي أولا
لأن ببساطه العيان ده كان عنده إنفلونزا طيور لأنه من منطقه ريفيه ومربي طيور في البيت وبيخالطها والطيور اللي عنده كان فيها إصابه يوما ما والمريض اتنقلت له العدوى وبقى عنده انفلونزا الطيور وطبعا الصيدلي عمره ما هيفكر ياخد منه تاريخ مرضي أو تاريخ مخالطه لحيوانات مصابة أو ميته بالرغم من الوعي اللي المفروض الناس تكون وصلتله لكن أهم حاجه عند الصيدلي ودا من وجهة نظري هيا التجاره وانه يمشي سلعه عنده بدل ما تيجي عليه بخساره بالرغم من انها ممكن تكون خطر على حياة الناس وممكن حياته في يوم من الأيام
يعني لو طلبنا من كل الصيادله الامتناع عن بيع مجموعات الإنفلونزا على الأقل الفتره دي طبعا محدش هيستجيب لأننا شعب بيحب الإنتحار
لكن أنا بكرر الطلب منكم انتم الصيادلة بالذات لأنكم مشتركين معنا كأطباء في مواجهة ما يسمى بجائحة إنفلونزا الطيور طبعا بغض النظر عن إنفلونزا الخنازير أو الإنفلونزا المستجده احنا كل يوم والتاني عندنا إجتماعات وندوات وتعليمات في الوحدات الصحية والمستشفيات بأن ممنوع أي حد يدي أي علاج لأي مريض يعاني من أعراض برد زي ما قلنا قبل كده مع وجود تاريخ مخالطه لطيور بالمنزل سواء كانت مصابة أو غير مصابه وطبعا كل الدكاتره بتنفذ وبقى البروتوكول اليومين دول هو تحويل أي حاله زي كده للمستشفى عشان يتعمللها هناك التحليل الخاص بإنفلونزا الطيور هوا تحليل مكلف للدولة والحكومة بتعمله ببلاش لأاي حد متحول من أي عياده وفي إشتباه في حالته بس لو تعرفو ان تكلفة التحليل ده لو اتعملت للشخص الواحد عشرين مرة خلال الأسبوع هتكون اقل بكتير من التكلفه اللي ممكن الدولة تتحملها لو فعلا حصلت الجائحه أو انتشر المرض بصورة وبائية في مصر وعلى فكره وزارة الصحه رافعه حالة الإستعداد القصوى للخطر ده حالة الطوارئ معلنه من زمان ومش عايزه اقول إيه هيا الإستعدادات اللي الوزارة عملاها عشان الناس متترعبش بس يا جماعه بجد الموضوع خطير وأكبر مما تتخيلو
عشان كده بوجه ندائي مرة تانيه لكل الصيادله بالذات لأن الأطباء عارفين الكلام ده كويس وعارفين دورهم كويس لكن الصيادلة كتير منهم مش عارف وبقوللكم مرة تانيه
بلاش مجموعة الانفلونزا